Komandamız

Şirkətlərdə komanda ruhunun olması çox vacibdir. Belə ki, şirkət əməkdaşlarının hər biri əslində şirkətin məqsəd və hədəfləri üçün çalışan komandanın bir üzvüdür. Və ya şirkəti bir bədən kimi düşünsək  hər bir əməkdaş bir bədən üzvü kimi çalışır. Onlar bir-biri ilə sistemli şəkildə çalışmalıdırlar.

Bədən üzvlərinin biri digərinə mən yorulmuşam, biraz dayanım deyə bilməz. Dayanarsa, bədən xəstələnib deməkdir. Xəstələnibsə, bədənin həmin üzvünü müalicə etdirmək lazımdır və ya başqa sözlə desək, komandanızın sizin ümumi ahəngə uymayan həmin əməkdaşını komandadan ayırmaq lazımdır.

Bədənin hər bir üzvü öz vəzifəsini yerinə yetirmək məcburiyyətindədir. Eyni zamanda şirkət əməkdaşları şirkətin missiya və vəzifələrinə uyğun olaraq hərəkət etməli, düşüncə olaraq da şirkətin məqsədləri üçün bütün potensialı ilə çalışmalıdırlar.

Komanda üzvlərinin öz aralarındakı anlayış və davranışlar komanda ruhunu canlı tutan ən önəmli xüsusiyyətlərdir. Həmçinin, hər bir üzvün ruh halı, şəxsi keyfiyyətləri, təhsil səviyyələri, həyata və işinə baxışı, qazandığı təcrübələri və s. komanda ruhunun yaranmasına təsir edən digər xüsusiyyətlərdir.

Əgər komanda üzvlərinin təhsil səviyyələri, təcrübələri, şəxsi keyfiyyətlərində ciddi fərqlər olarsa, eyni işlərin üzərində çalışarkən bir-birini anlamaqda çox çətinlik çəkərlər, işin görülməsi kənarda qalar və bir-birilərini anlamağa çalışarlar. Anlayana qədər də xeyli vaxt itirə bilərlər və ya iş alınmaz.

Şirkətə yeni əməkdaşlar qəbul edərkən yuxarıda deyilənlərə uyğun olmayan namizədləri işə qəbul etmək – həm şirkətə, həm də digər əməkdaşlara (komanda üzvlərinə) haqsızlıq olar. Boşuna vaxt və resurs israfı olar. Dolayısı ilə şirkət rəhbərliyinin konamdanı canlı və ruh halını yüksək səviyyədə tutmaq kimi bir vəzifəsi var.